Хромофобен бубрежно клеточен карцином

Хромофобен бубрежно клеточен карцином е редок подтип на карцином на бубрежни клетки кој потекнува од интеркалатните клетки на колективните канали и макроскопски се манифестира како добро ограничен, високо лобуларен, солиден тумор, кој обично се дијагностицира во рана фаза. Често е асимптоматски или може да се презентира со неспецифични симптоми како губење на килажа, треска и умор. Класичната презентација кај тумор на бубрег (хематурија, болка и палпабилна маса) повремено е присутна и обично е индикатор на напреден стадиум на болеста. Најчесто е спорадична но сепак опишани се и неколку семејни случаи поврзани со Бирт-Хог Дуб синдром.