Мукополисахаридоза тип 2, ослабена форма

МПС2атт е клинички хетерогена, со многу варијабилна стапка на прогресија. Пациентите се здрави при раѓање, при што суптилните почетни симптоми се појавуваат помеѓу 18 месеци и 4 години, па дури и подоцна, со појава на папочна или ингвинална хернија. Карактеристичните фацијални карактеристики (задебелување на усните и ноздрите, зголемен и испакнат јазик), се формираат бавно и првенствено може да се забележат на возраст од 2-4 години (честопати не е евидентно до подоцнежен период). Слабоста на горниот респираторен тракт може да биде одговорна за чести инфекции, особено отитис медиа; прекумерно 'рчење и апнеа при спиење; карактеристичен рапав глас и прогресивно губење на слухот. За време на раното детство, има застој во растот, па пациентите имаат краток раст со мултипна дизостоза и вкочанети зглобови што можат да доведат до болни движења, па се до дисплазија на колкот. Зглобовите помеѓу фалангите се со присуство на контрактури, што резултира со изглед на рацете како на канџи; а исто така честа појава е карпал тунел синдромот. Може да се појави и спастична пареза како резултат на компресија на 'рбетниот мозок во кранијално-цервикалниот регион. Притисокот врз оптичкиот нерв може да доведе до губење на видот. Дегенерацијата на мрежницата исто така е забележана кај некои случаи. Генерално, пациентите со МПС2атт немаат когнитивни нарушувања.