Спектар на септо-оптичка дисплазија

Тежината е променлива, па само 30% од пациентите ја имаат целосната клиничка тријада, а многу пациенти имаат поврзани наоди. Кај некои пациенти СОД се појавува при раѓање со повеќекратни конгенитални аномалии, додека кај други пациенти се појавува за време на детството со застој во растот и/или аномалии на видот (најчесто страбизам или нистагмус). Хипоплазијата на оптичкиот нерв може да биде еднострана или двострана (57% и 32% од случаите, соодветно), а значајно оштетување на видот се јавува кај 23% од пациентите. Хипопитуитаризам се јавува кај 62-80% од пациентите, иако недостатокот на хормонот за раст (води до низок раст во детство) е најчестата ендокрина аномалија, може да се развијат дополнителни инсуфициенции на хормони (недостаток на тироид-стимулирачки, адренокортикотропен и гонадотропин-ослободувачки хормони). Дефектите на средната линија на мозокот вклучуват агенеза на септум пелуцидум (60% од случаите) и/или корпус калосум. Исто така пријавени се и поврзани кортикални малформации (понекогаш наречени и СОД-плус синдром). Може да се присутни интелектуален дефицит и невролошки манифестации (застој во развој, напади и церебрална парализа). Дополнителните наоди може да вклучат дијабетес инсипидус, нарушувања на сон, аутизам, предвремен пубертет, прекумерна телесна тежина, терморегулаторни нарушувања, анозмија, сензориневрален губиток на слух, како и срцеви аномалии и аномалии на прстите.